標籤: 大灣區一卡通

簡介

中銀雙幣卡大灣區一卡通分為鑽石卡同白金卡，主打指定手機支付有高達4.4%或2.4%現金回贈。呢張雙幣卡非常適合喺中銀有人民幣戶口嘅朋友申請，因為港幣同人民幣簽賬分開結算，可以直接用人民幣找數，唔存在蝕匯率嘅問題；用呢張卡喺内地搭公共交通工具可以直接拍卡或用雲閃付乘車碼付款，方便唔想用Alipay HK或者微信支付嘅朋友。

• 手機支付：高達4.4%或2.4%現金回贈
• 迎新優惠：手機簽賬HK$3,000回贈HK$300
• 內地簽賬以人民幣結算，唔會蝕匯率
• 内地交通拍卡付款，方便出行
• 機場及高鐵貴賓室服務（限鑽石卡）

迎新優惠

由即日起至2025年12月31日，新客戶喺發卡當月及隨後兩個月內，以指定手機支付形式（雲閃付APP/Apple Pay/Huawei Pay）消費（只限零售簽賬），享10%現金回贈。期內最高現金回贈金額為HK$300，即簽HK$3,000回贈HK$300，回贈門檻相對容易達到。

（八達通/PayMe/Alipay HK/WeChat Pay等電子錢包增值唔計零售簽帳）

迎新須知

中銀信用卡新客戶定義：過去12個月內未曾持有或取消任何信用卡主卡

積分回贈

同其他中銀信用卡一樣，喺現金回贈之外，有基本積分，簽HK$1/人民幣1元可賺取1積分（相等於0.4%回贈）。

積分兌換方法

• 積分兌換率為250分=HK$1，相等於0.4%現金回贈
• 平時用BOC Pay+消費之後，可以直接用積分抵銷簽賬（HK$1都得）/登入中銀網上銀行兌換積分
• BOC Pay+不時會推出限時抵銷積分推廣，可以留意中銀推廣電郵

現金回贈

以指定手機支付形式（雲閃付APP/Apple Pay/Huawei Pay）消費（只限零售簽賬），鑽石卡可以賺4%現金回贈；白金卡可以賺2%現金回贈，港幣及人民幣賬戶簽賬合併計算，1元人民幣簽賬當HK$1計算。要留意一點，港幣同人民幣簽賬分開結算，人民幣簽賬要用人民幣找數。

每個月現金回贈上限係HK$100，鑽石卡簽HK$2,500就會簽爆回贈上限；白金卡簽HK$5,000就會簽爆回贈上限，現金回贈一般會喺交易後下一個月內回贈。

換句話講，每個月首HK$2,500，鑽石卡可以賺4.4%現金回贈；白金卡首HK$5,000可以賺2.4%現金回贈，超過上限嘅消費都有HK$1/人民幣1元=1積分，相等於0.4%現金回贈。

由於大灣區一卡通係銀聯卡，Google Pay目前未支援用銀聯卡，所以只能另外下載雲閃付APP去食現金回贈，蘋果或華為用戶就可以用返Apple Pay/Huawei Pay。

4%/2%現金回贈推廣目前做到2025年3月31日，優惠之後會唔會續要留意中銀公佈。

*現金回贈會直接入落戶口，淨係「簽賬得 FUN」積分要自己兌換。

兌換飛行里數

可以用中銀積分兌換里數，不過每兌換5,000里數會收HK$50手續費（如兌換里數少於 5,000 里數，亦會收取相等於兌換 5,000 里數之手續費）；每次最低收費為 HK$100。

人民幣結算内地簽賬

人民幣簽賬直接以人民幣結算，大家可以先鎖定心水匯率，換定人仔，存入中銀戶口，喺內地消費後，會以人民幣結算，唔存在蝕匯率/手續費嘅問題。

内地交通拍卡付款

喺大灣區內，廣深城際和諧號、廣州地鐵、深圳地鐵可以拍卡付款；港珠澳大橋可以拍卡或掃手機二維碼付款。

江浙滬地區都可以用大灣區一卡通搭車，包括杭州地鐵、杭州公交；上海公交、磁懸浮列車；寧波地鐵、公交；蘇州地鐵；南京地鐵、公交都可以直接用大灣區一卡通拍卡付款。

其他特色*

• 機場及高鐵貴賓室服務
• 優惠價享受機場接送服務（限鑽石卡）
• 指定餐廳套餐買1送1 （限鑽石卡）

*要符合指定簽賬要求

海外簽帳手續費

中國內地人民幣唔會收取手續費；其他外幣交易手續費為簽帳額嘅1%。

如果以港幣結算海外簽帳，中銀唔會再額外收手續費。

八達通增值

八達通自動增值的增值上限係HK$3,000，基本積分回贈係HK$1=1積分，積分兌換率係250分=HK$1，相等於0.4%現金回贈，八達通自動增值每月可以享高達HK$12現金回贈。（八達通增值唔計入迎新零售簽賬）

PayMe增值

滙豐暫未接受綁定其他銀行嘅銀聯卡，所以大灣區一卡通並唔適用於PayMe。

其他簽賬

鑽石卡/白金卡簽滿HK$100現金回贈上限後，所得嘅基本積分回贈係HK$1=1積分/人民幣1元=1積分，積分兌換率係250分=HK$1，相等於0.4%現金回贈。

年費

第一年豁免年費，之後鑽石卡年費HK$3,800；白金卡年費HK$1,600，如果持有中銀戶口或致電熱線申請，基本上可以豁免年費。

申請要求

鑽石卡年薪要求係HK$200,000或以上；白金卡年薪要求係HK$150,000或以上。

總結

編輯看法：如果以主打現金回贈嘅中銀信用卡嚟講，除咗中銀Sogo Visa Signature信用卡之外，第二好用就係呢張大灣區一卡通，鑽石卡/白金卡最高享4.4%/2.4%現金回贈，鑽石卡/白金卡每個月可以簽HK$2,500/HK$5,000，對消費唔高嘅人嚟講已經好夠用。唯一美中不足之處係唔係所有店鋪都可以用銀聯，使用範圍比一般信用卡少。

至於其他鑽石卡專屬優惠，小編就覺得唔太吸引，大部分都需要大額消費先可以享受到，如果要入機場貴賓室，中銀嘅Cheers Card係更好嘅選擇。

常見問題